Меси најплатен, па Роналдо

Лионел Меси, фудбалерот на Барселона, според истражувањата на „Франс фудбал“, по петти пат во последните шест години е најплатен светски фудбалер.

Аргентинецот инкасирал неверојатни 65 милиони евра во 2014 година, оставајќи го зад себе најголемиот ривал Кристијано Роналдо – кој заработил девет милиони помалку.
На третата позиција се наоѓа Нејмар да Силва, колегата на Меси од Барселона, со заработка од 36,5 милиони, четврт е земјакот на Силва, Тијаго Силва со 27,5, додека на петтото место се наоѓа Робин ван Перси од Манчестер јунајтед со 25,6 милиони евра.
Потоа следуваат: колегата на Роналдо, Герет Бејл (23,8), Вејн Руни, капитенот на Јунајтед (22,5), првата ѕвезда на ПСЖ, Златан Ибрахимовиќ (21,5) и напаѓачот на Манчестер сити, Серхио Агуеро (21,2), додека листата ја комплетира Роберт Левандовски од Баерн Минхен (20,2).
Освен споменатите десетмина, само уште двајца играчи минатата година го заминаа бројот 20 милиони според заработката.
Капитенот на репрезентацијата на Аргентина е најплатениот играч на денешницата, нему Барселона му исплаќа 20 милиони евра, додека остатокот од сумата доаѓа од: неговиот генерален спонзор „Адидас“, авиокомпанијата „Туркиш ерлајнс“, американските гиганти „Пепси“ и „Жилет“, како и од корејскиот „Самсунг“.
Од друга страна, официјално најдобриот играч на светот во кралскиот клуб заработува три милиони помалку, а освен американскиот „Најки“, кој годишно му исплаќа малку помалку од 20 милиони евра, спонзори му се уште и: прочуениот произведувач на часовници „Таг Хојер“, „Кока-кола“, „Кастрол“, јапонскиот „Конами“, „Моторола“, „Јакобс & Цо“, „Армани“, „Флај Емиратес“...
Но, листата на „Форбс“ зборува дека ситуацијата е малку поинаква кога се во прашање најплатените спортисти на светот -  бидејќи по првопласираниот, американскиот боксер Флој Мејведер (100 милиони евра), следува токму Португалецот со 75 милиони, додека Меси е дури четврти со 61 милион.

Топ 10 најбогати фудбалери во 2014 година:
1. Лионел Меси (Барселона) 65 милиони
2. Кристијано Роналдо (Реал Мадрид) 56
3. Нејмар да Силва (Барселона) 36,5
4. Тијаго Силва (ПСЖ) 27,5
5. Ван Перси (Манчестер јунајтед) 25,8
6. Герет Бејл (Реал Мадрид) 23,8
7. Вејн Руни (Манчестер јунајтед) 22,5
8. Златан Ибрахимовиќ (ПСЖ) 21,5
9. Серхио Агуеро (Манчестер сити) 21,2
10. Роберт Левандовски (Баерн Минхен) 20,5