06.6.2012 Лил го доведе Мартен како замена за Азар
Францускиот Лил брзо најде замена за Еден Азар, кого неодамна го продаде на Челзи. Од Сошо е доведен Марвен Мартен, офанзивен играч за врска и француски репрезентативец.
Со продажбата на еден од своите најдобри фудбалери, одличниот белгиски играч за врска, се отвори празнина во редот за врска на Лил, кого идната сезона го очекуваат квалификации за Лигата на шампионите. Управата на клубот веднаш реагираше и во своите редови го доведе Марвен Мартен, кој игра на таа позиција, а минатата сезона за Сошо постигна два погодоци и девет асистенции во францускиот шампионат.
Мартен веќе има 11 настапи и два погодоци за националната екипа, а селекторот Лоран Блан го поведе на Евро во Украина и Полска.
Француските медиуми проценуваат дека за неговите услуги Лил му исплатил меѓу 8 и 10 милиони евра на Сошо, со кого 24-годишниот Мартен има договор до летото 2015 година.