28.12.2016 Рамос го напушти клубот Малага
Шпанскиот тренер Хуанде Рамос ја напушти клупата на Малага по серијата лоши резултати, објави клубот од Андалузија.
Елиминацијата од второлигашот Кордоба во Кралскиот куп и само едната победа во последните пет натпревари во Примера лигата го означија крајот на вториот мандат на Рамос во Малага само по седум месеци.
Шпанскиот клуб соопшти дека договорно е раскината соработката со 62-годишниот стручњак, а новиот наследник ќе биде познат до осми јануари, кога Малага ќе гостува кај Селта во продолжение на Примера лигата.
Фудбалерите на Малага се наоѓаат на 11-тото место на табелата на шпанското првенство со 21 бод.