Преговорите прекинати, претсезоната на НБА откажана

На последниот состанок во Њујорк, челниците на НБА-лигата, сопствениците, играчите и претставниците на Унијата не постигнаа договор.

Комесарот Дејвид Штерн ја откажа претсезоната, а доколку не се најде решение за овој сложен проблем до крајот на неделава, ќе следува и одложување на натпреварите од новата сезона, која треба да почне од ноември.

„Играчите бараа да се распредели приходот на 53/47, а сопствениците обратно. Поставив прашање дали на двете страни ќе им одговара 50/50? Тоа не беше прифатено, па затоа моравме да ги прекинеме преговорите. По четири часа повеќе немаше смисла да продолжиме да разговараме, затоа што очекувавме напредок. Потребни се нови идеи и концепти. Во моментов немаме план“, заклучи Штерн.

Нов состанок не е закажан, што оди во прилог дека НБА нема да стартува на време. Последен пат вакво нешто се има случено во сезоната 1998/99, кога се одиграа само 50 од вкупно 82 натпревари, а изостана и Олстар-натпреварот.

„Ова ќе биде огромна штета. Може да се очекуваат големи загуби. Разочаран сум од ваквиот исход. Мислев дека понудата 50/50 има смисла, дека ќе биде прифатена како појдовна точка за понатамошните преговори“, рече Адам Силвер, висок НБА-претставник.

Играчите понудија намалување на вкупниот приход од 57 на 53 отсто и најавија дека сопствениците би заработиле дополнителни милијарда долари во следните шест години.

„Не најдовме излез. Ова дефинитивно не беше ден за преговори. Јазот остана голем. Нашиот проект не е само за денешните кошаркари, туку проект за иднината“, истакна Дерек Фишер, претседателот на Асоцијацијата на играчите.

На состанокот присуствуваа и ѕвездите Коби Брајант, Пол Пирс, Кевин Гарнет, Амари Стадемаер итн.