17.9.2013 Торстен Финк доби отказ во Хамбургер
Исклучително бледата игра на почетокот на новата бундеслигашка сезона беше причина за смена на тренерот во Хамбургер. Торстен Финк веќе не е тренер на екипата на овој германски бундеслигаш.
По синоќешниот состанок на раководството на клубот, денес во јавноста е сервирана информацијата дека 45-годишниот Финк само по пет кола во новата сезона, доби отказ во овој клуб.
Торстен Финк, некогашниот успешен фудбалер на Баерн од Минхен, од 2011 година беше во Хамбургер, а претходно во неговата тренерска кариера беше тренер на Инголштад и Базел.
Хамбургер на стартот на новата сезона имаше три порази и по една победа и реми, а моментно се наоѓа на 15-тото место на табелата. Отказот следуваше по тешкиот пораз кај Борусија во Дортмунд (6-2), а Хамбургер имаше уште една непријатна средба оваа сезона, домашниот пораз од 5-1 од Хофенхајм.
Се очекува дека клубот многу брзо ќе го именува наследникот на Финк.