09.2.2015 Повторно немири во Египет, дваесет и двајца мртви
Судирот меѓу полицијата и навивачите на фудбалскиот клуб Замалек во Каиро имаше трагичен крај.
Најмалку 22 лица загинале во синоќешниот судир меѓу полицијата и навивачите на фудбалскиот клуб Замалек во Каиро, пред натпреварот од првенството на Египет против екипата на Енпи, потврди државниот обвинител.
Египетските државни медиуми синоќа пренесоа дека настрадале 14 луѓе во големите нереди кога илјадници навивачи се обиделе насилно да влезат без билети на стадионот на периферијата на Каиро.
Во настојувањето да воспостави ред, полицијата користела и солзавец кога навивачите на Замалек се обиделе да ги пробијат влезните врати на стадионот.
Пред три години во Порт Саид беа убиени 74 лица, главно навивачи на Ал-Ахли, а околу 1.000 лица беа повредени во големите нереди по натпреварот против домашниот клуб Ал-Масри.
Фудбалската федерација на Египет ги суспендираше натпреварите во лигата, слично и како пред три години, кога првенството беше прекинато.