25.9.2018 Иско опериран од слепо црево
Реал Мадрид нема да смета на својот плејмејкер во следните три до четири недели.
Фудбалерот на Реал Мадрид, Иско, нема да може да игра еден месец бидејќи денеска му беше извршена операција на слепото црево. Ова може да биде хендикеп за тимот во пресрет на серијата тешки натпревари, од кои првиот е утревечер, на традиционално незгодното гостување кај Севилја, каде што Реал загуби пет од последните шест посети на „Санчес Писхуан“.
Иско денеска не се појави на тренингот на Кралскиот клуб, а потоа беше обелоденето дека имал болки и веднаш заминал на операција. Лекарите прогнозираат дека шпанскиот репрезентативец нема да може да игра во следните три до четири недели.
Неиграњето на Иско е шанса за Дани Себалјос (ексиграч на Бетис) да биде стартер против тимот чии навивачи не го сакаат. Можно е шанса да добие Лукас Васкес, што би значело дека Реал повеќе ќе игра преку крилата, а не низ средината на теренот.
Во тимот на Реал утре против Севилја ќе го нема ниту Даниел Карвахал, кој уште ја нема залечено повредата, па десната бековска позиција ќе ја пополни Одриосола. Целта на Реал е Карвахал да биде оспособен за дербито со Атлетико Мадрид следниот викенд.