Пауло Сержио го презеде Клуж

Актуелниот романски шампион Клуж го ангажира Португалецот Пауло Сержио за нов тренер на местото на Јоан Андоне, кој минатата седмица договорно го напушти клубот.

Четириесет и четиригодишниот Сержио е 12-ти тренер на клупата на Клуж од 2004 година и втор Португалец откако Жорже Коста го напушти клубот во април оваа година.
Сержио досега беше ангажиран во Виторија Гимараис и Спортинг од Лисабон.
Клуж моментно е втор во групата Х на Лигата на шампионите, со една победа, пораз (од Манчестер јунајтед) и едно реми.
На Клуж слабо му оди во домашното првенство и моментно е седми со 19 бодови од 13 натпревари, а со 13 бодови заостанува зад водечката Стеауа.