21.2.2018 Пресметка на шампионите од Лигата на Европа во Севилја
Завесата на првите натпревари од осминафиналето на Лигата на шампионите се спушта со гостувањето на Манчестер јунајтед во Севилја, односно со дуелот на Шахтар и Рома во Харков.
Во „сенка“ на наводните проблеми со Пол Погба, екипата на Жозе Мурињо оди во Андалузија, кај тимот кој од доаѓањето на Винченцо Монтела игра топло-ладно, но е специјалист за европските натпреварувања.
Севилја три пати последователно ја освојуваше Лигата на Европа (2014, 2015, 2016), пред на тронот на помалото натпреварување на УЕФА да ја наследи токму Јунајтед.
Не е лесно да се победи Севилја на нејзин терен. Како и обично, главен адут на Мурињо на средината на теренот ќе биде Немања Матиќ.
„Многу сме среќни што се враќаме на теренот во Лигата на шампионите. Севилја е одличен тим, исклучително ги почитуваме, посебно се опасни на домашен терен. Сигурен сум дека уште од почетокот ќе бидат агресивни, но ние имаме своја цел, свесни сме за своите квалитети и ќе бидеме подготвени“, изјави Матиќ за клупската интернет-страница.
Вечерва и Рома ќе гостува кај Шахтар во Харков, а против украинскиот клуб паѓале и подобри од Рома.
И додека во Севилја ќе се игра на најмалку 15 степени во плус, во Харков за време на натпреварот се очекува температурата да биде минус десет степени.
И двата натпревара се играат во стандардниот термин од 20.45 часот.