06.9.2018 Панчев и Најдоски, на почесен круг на „Маракана“ пред мечот со Наполи
Генерацијата на Црвена ѕвезда која ја освои единствената титула во Лигата на шампионите ќе направи почесен круг на стадионот „Рајко Митиќ“ пред дуелот со Наполи
Српскиот шампион Црвена ѕвезда по 26 години повторно ќе учествува во најелитното европско клупско натпреварување. Првиот меч од групната фаза ќе го играат пред своја публика, на популарната „Маракана“, односно стадионот „Рајко Митиќ“, а гостува италијанскиот вицепрвак Наполи.
Во пресрет на мечот, клубот од Белград огранизираше манифестација на која ќе се појави шампионската генерација од 1991 година, меѓу кои се и нашите Дарко Панчев и Илија Најдоски. „Златните“ момци од Бари ќе направат почесен круг пред почетокот на мечот. Оваа генерација по освојувањето на најпрестижниот трофеј во Европа, подоцна стана и светски првак.
Во групата Ц, Ѕвезда за противници ги има Наполи, Ливерпул и ПСЖ, додека првата пресметка со „наполитанците е закажана за 18-ти септември, со почеток во 21 часот.