27.10.2016 Неверојатниот Дејвис испиша историја во НБА-лигата
Ентони Дејвис, центарот на Њу Орлеанс, ја испиша историјата на најсилната кошаркарска лига на светот во првиот натпревар во новата сезона.
Пеликаните на свој терен се поразени од Денвер со 107:102, а Дејвис натпреварот го заврши со 50 поени, 16 скокови, пет асистенции, седум украдени топки и четири блокади.
Дејвис со овој неверојатен учинок стана прв играч во историјата со 45+ поени, 15+ скокови, 5+ асистенции и 5+ украдени топки на еден натпревар!
Ѕвездата на Њу Орлеанс исто така го оствари и четвртиот најдобар кошгетерски учинок некогаш во првиот дуел во новата сезона.
Поефикасни од Дејвис биле само: Вилт Чембрлен со 56 поени (сезона 1962/63), Мајкл Џордан со 54 (1989/90) и Елџин Бејлор со 52 поени (1959/60).