21.6.2013 Ернесто Валверде нов тренер на Атлетик Билбао
Ернесто Валверде очекувано е именуван за нов тренер на шпанскиот фудбалски прволигаш Атлетик Билбао.
Четириесет и деветгодишниот Валверде на клупата на Атлетик го наследи Марсело Бјелса, а потпиша двегодишен договор. Информацијата синоќа преку својата официјална интернет-страница ја потврди баскискиот клуб.
Валверде минатата сезона ја заврши на тренерската клупа на Валенсија, која не успеа да ја воведе во најелитното фудбалско натпреварување – Лигата на шампионите. Валенсија во Примера лигата се пласира на петтото место, иако пред последното коло беше четврта. Но, поразот во 38-мото коло кај Севилја (4-3), комбиниран со победата на Реал Сосиедад, ја фрли на петтото место.
Официјалното претставување на новиот тренер на екипата од „Сан Мамеш“ ќе се одржи на денешната конференција за новинарите.