Почина фудбалер на Ескисехирспор

Турскиот фудбалски сојуз побара дозвола од Меѓународната фудбалска организација репрезентативците за време на натпреварот против Холандија во петок да носат црни ленти бидејќи во вторникот почина Едиз Бахтијароглу, член на Ескисехирспор.

Поранешниот турски младински репрезентативец доживеа срцев удар во вечерните часови во вторникот, по малку време откако се вратил од клупскиот тренинг. Дваесет и шестгодишниот Бахтијароглу се онесвестил во куќата во која живеел со состанар, а возилото на медицинската помош стасало предоцна за да помогне.
„Немаше тежок тренинг таа вечер. Точната причина за смртта ќе биде позната по резултатите од аутопсијата“, изјави клупскиот лекар Али Армаган.
Бахтијароглу по потекло е од Босна и Херцеговина, а името, пред да го преземе турското, му беше Едис Бахтијаревиќ.