ЖРК Вардар против Будуќност за финале на Фајнал фор

Во полуфиналето на Фајнал фор турнирот во ракометната Лига на шампиони македонскиот ракометен шампион ЖРК Вардар ќе се сретне со Будуќност.

Шампионот на Црна Гора се пласира на второто место во групата 2, откако Ѓер го победи Ларвик со 31-29 во последното коло. Во втората полуфинална средба играат Ѓер и Митјиланд.
Полуфиналните натпревари ќе се одиграат на трети мај, додека финалето и средбата за третото место се закажани еден ден подоцна. Фајнал фор турнирот ќе се одржи во Будимпешта.
“Најпрвин морам да ѝ се заблагодарам на нашата верна публика затоа што не бодреше вечерва, но и во целата сезона. Многумина очекуваа од нас да го оствариме овој успех, што уште повеќе ни ја отежнуваше работата, а исто така, имаше и такви кои не веруваа во нас. Ја остваривме нашата главна цел, се пласиравме на Фајнал фор, но не застануваме тука. Верувам дека времето кое го имаме до почетокот на мај ќе го искористиме за отстранување одредени грешки и што поподготвени да одиграме во Будимпешта“, изјави Индира Кастратовиќ, тренерот на ЖРК Вардар, по победата од 24-18 над Савехоф и историскиот успех и пласманот на Фајнал фор.