Корисничко име Лозинка Пријави се
  • БОЈА:
13.1.2018

Хрватска убедлива против Србија, Норвешка ја намачи Франција

Хрватите одиграа одличен натпревар и со 32-22 ја совладаа Србија, додека актуелниот светски ракометен шампион Франција, потешко од очекувањата, славеше со минимален резултат од 32-31 против Норвешка на стартот од Европското првенство во ракомет.

Дербито меѓу Хрватска и Србија заврши според очекувањата, домашната екипа го одигра натпреварот на највисоко ниво и го победи вечниот ривал Србија со разлика од десет гола.
Избраниците на Лино Червар постојано водеа, а Србија добро се држеше во првото полувреме. Во 25-тата минута резултатот беше 10-9 за Хрватите, кога ја почнаа серијата од 4-0 и на полувремето заминаа со 14-9.
Во вториот дел од средбата, Хрватска повторно беше доминантна, имаше одлична игра на сите позиции на теренот, особено на крилата, каде што Штрлек и Хорват го погаѓаа голот на Србите. Хрватските ракометари целосно го контролираа натпреварот и на крајот заслужено славеа.
Лука Степанчиќ постигна шест погодоци од шест удари, а исто толку даде и Штрлек. Лука Цилиндриќ првото полувреме го заврши со четири погодоци од четири удари, а Игор Караџиќ постигна два гола и имаше неколку одлични асистенции. Кај Србите најдобар беше Ненадиќ со шест постигнати гола.
Во селекцијата на Хрватска, Домагој Дувњак се повреди во самиот финиш на натпреварот, па мораше да го напушти теренот.
Франција, која е актуелен светски шампион, одлично го почна натпреварот и брзо направи предност од три гола. Потоа Норвежаните побараа тајмаут, па влегоа во серија, ја стопија предност на фаворитот и на полувремето заминаа со резултат 15-17.
Во вториот дел, Норвешка продолжи во ист ритам и во неколку наврати имаше предност од три погодока.
Франција дојде до израз во финишот на средбата, на осум минути пред крајот, Карабатиќ изедначи за изедначување (27-27), па потоа се играше гол за гол, а последниот го постигнаа Французите. 
На 15 секунди пред крајот, Гигу погоди за 32-31 и со тоа ѝ донесе победа на Франција на стартот на Европското првенство.
Најдобар стрелец за светскиот шампион беше Мае со осум постигнати гола, а Гигу даде пет. Кај Норвежаните најдобар беше Тонесен со седум погодоци.

Најнови вести