Почна „Мисијата да се победи Косово“, на стартот на подготовките се појавија седуммина кошаркари

Седум репрезентативци на Македонија се појавија на почетокот на подготовките за претквалификациите за Евробаскет 2021, а мисијата ја почнуваме против Косово.

Александар Костовски, Бојан Крстевски, Кире Николовски, Димитар Караџовски, Бобан Стајиќ, Адем Мекиќ и Предраг Пајиќ беа присутни на првиот тренинг на македонската репрезентација, вечерва. Нашата А селекција ги почна подготовките за претквалификацискиот циклус натпревари на патотот кон ЕП 2021 година.

Од задутре ќе се приклучат шестмина кошаркари на МЗТ Скопје, а последна ќе се приклучи тројката интернационалци Бојан Трајковски, Војдан Стојановски и Стојан Ѓуроски.

„Го поминавме првиот круг, почнуваме со вториот. Како и сите други репрезентации и ние имаме проблеми со играчите и нормално е за овој период да биде така. Но, што е тука е, ќе се прилагодуваме. Ќе почнеме денес, другите ќе се приклучат подоцна. Ги чекаме шестмината од МЗТ Скопје, како и странските кошаркари - Бојан Трајковски, Војдан Стојановски, Стојан Ѓуроски... Иако на хартија натпреварите изгледаат лесно, ќе бидат доста тешки, особено во ваква ситуација. Ќе се обидеме максимално да се подготвиме и да одиграме на ниво. Особено важен ни е првиот натпревар против Косово. Оптимист сум, мислам дека ќе успееме во овој циклус.Разговарав со Хендрикс неколку пати. Ако кажам дека нешто е конечно - ќе излажам. Уште разговараме со него и со клубот. Јас до последен момент нема да се откажам. Како што сега стојат работите, многу тешко е да го имаме Хендрикс. Но, да видиме, беше тешко и пред девет месеци, па во последен момент го добивме. Друга комбинација немаме - или Хендрикс, или без странец. Витингтон е повреден, а Џордан од февруари не настапува. Но, со БиХ, Холандија и Португалија игравме без странец. Работите ќе зависат од нас и нашите глави. Ако психички влеземе подготвени во натпреварите, може да одиграме на ниво, зависи дали со или без странец“, изјави селекторот Јорданчо Давитков.