Трајковски смени број во Палермо, Тедино очекува блесок од новата „десетка“

Александар Трајковски ќе ја почне новата сезона во дресот на Палермо, со нов број, со легендарната „десетка“ на грбот, а од него се очекува многу во таборот на Сицилијанците

Македонскиот репрезентативец, Александар Трајковски ја замени седмицата со десетка и во новата сезона ќе го носи дресот со број 10 во Палермо. Десетката има специфична тежина во светот на фудбалот, а тој дрес го носеле големи мајстори на фудбалската игра.
„Трајковски е веќе зрел играч, му дозволивме тој да го има дресот со број 10. Дрес со посебно значење и верувам дека во новата сезона ќе ни возврати со добри игри. Од него очекувам многу, да биде еден од лидерите на Палермо. Имам потполна доверба и во него и во сите останати играчи. Кога Алекс игра добро и Несторовски е на посакуваното ниво. Тие се познаваат добро, двајцата се репрезентативци на Македонија и верувам дека со добри игри ќе ни носат бодови. Тука се и Морео и Пушкаш, па конкуренцијата ќе биде одлична, а ќе имаме добар избор во нападот за различни натпревари“, изјави тренерот на Палермо, Бруно Тедино.
Палермо денеска ја почнува новата сезона во Серија Б, на гостувањето во Салерно, кај Салернитана и е еден од главните фаворити за кам-бек во Серија А.
Иако се шпекулираше дека ќе си заминат и Трајковски и Несторовски останаа на Сицилија и ќе бидат меѓу главните адути на Палермо во обидот да се вратат во најсилната италијанска лига.