31.7.2018 Покетино: Не знам дали сакаме да доведеме некого
Маурисио Покетино, менаџерот на Тотенхем, не знае дали клубот сака да доведе некое засилување пред крајот на преодниот рок на деветти август.
Тотенхем сè уште нема доведено никого, иако аргентинскиот стручњак на крајот на минатата сезона изјави дека клубот мора да преземе ризик ако сака да напредува.
„Не можам да ви кажам дали ќе доведеме некого или не. Работиме на тоа, но не знам да ви кажам дали ќе доведеме еден, ниеден, двајца, тројца или четворица“, изјави 46-годишниот стручњак.
„Работиме. Точно е дека е крајот на преодниот рок, но клубот се труди да помогне и да доведе играчи кои ќе ни помогнат да ги оствариме целите“, додаде Покетино.
Во четирите сезони на чело на Тотенхем, аргентинскиот стручњак по ред беше петти, трети, втори и трети во Премиер лигата. Во мај потпиша нов, петгодишен договор.
Оваа сезона преодниот рок завршува на деветти август, ден пред почетокот на Премиер лигата, а во останатите најголеми лиги трае до 31-ви август.
„Ако се споредиме со Европа, мислам дека тие се во голема предност во однос на нас. Не знам дали останатите тимови се задоволни со таа одлука, лично јас не сум“, изјави Аргентинецот.
Во првото коло од Премиер лигата, Тотенхем ќе се сретне со Њукасл во гости на 11-ти август.