15.11.2017 „Аѕурите“ почнаа преговори со Анчелоти
Фудбалскиот сојуз на Италија почна да преговара со Карло Анчелоти околу преземањето на клупата на „аѕурите“.
Сојузот ги почна преговорите и покрај тоа што сегашниот селектор Џампјеро Вентура сè уште не е сменет по елиминацијата од Шведска во баражот за Светското првенство.
Карло Тавекио, првиот човек на Италијанскиот фудбалски сојуз, изјави дека верува дека некогашниот репрезентативец и освојувач на три титули на Лигата на шампионите во тренерската кариера (три со Милан и една со Реал Мадрид) е вистинското решение по дебаклот, пишува италијанскиот „Премиум спорт“.
Анчелоти е без ангажман откако во септември го напушти Баерн од Минхен и е прв кандидат да дебитира на клупата на Италија во март наредната година, во пријателските натпревари против Англија и против Аргентина.
Денес е закажан состанок меѓу Фудбалскиот сојуз на Италија и Вентура во Рим, каде што поранешниот тренер на Торино би требало да биде разрешен од должноста.
Засега Анчелоти има предност пред Роберто Манчини, тренерот на Зенит, и Луиџи ди Бјаџо, селекторот на младата репрезентација.